ÅRSMELDING 2007
Tillitsvalde i 2007-2008 har vore:
Styremedlemer:
Beint Foss, Tveit Historielag, leiar
Anders Auen Grimnes, Vestre Moland og Lillesand Historielag, nestleiar
Per Iversen, Mandal Historielag, styremedlem
Hallvard Tveit, Valle Sogelag, styremedlem
Ragnhild S. Larsen, Flekkefjord Historielag, styremedlem
Jan Arild Andersen, Stokken Historielag, styremedlem
Turid Bjørkenes, Holum Historielag, styremedlem
Sveinung Lien, Tvedestrand Historielag, styremedlem
Varamedlemer:
Helge Wiig, Holum Historielag
Else Berit Berge, Birkenes Historielag
Liv Kirsten Rølland, Tveit Historielag
Kari M. Bruli, Kvinesdal Historielag
Olaf Ingebretsen, Vennesla Historielag
Torhild Austad, Bygland Sogelag
Ellen Ledaal Gjertsen, Arendal Historielag
Jan A. Ommundsen, Tromøy Historielag
Valkomiteen:
Ellinor Lundberg, Arendal
Jørdis Hodnemyr, Vennesla
Olav Arne Kleveland, Evje
Per T. Knudsen, Kristiansand
Revisor:
Ettersynet av rekneskapen er gjort av fylkesrevisjonen i Vest-Agder
Skrivar:
Borghild Løver, Lindesnes
Verksemda i laget:
Styret
Det har vore 4 styremøte og 41 saker til handsaming i 2007. I tillegg har leiaren og skrivaren hatt møte mest kvar veke heile året.
Skrivar
Borghild Løver har vore skrivar tilsvarande 20% stilling.
Kontorlokale og arkiv
Lagskontoret har i 2007 vore i tredje høgda i Mållagsbygget midt i Kristiansand sentrum. Medlemene i historielaget har alltid kunna nå skrivaren per telefon dag som kveld og tinge bøker evt. avtale kontorgjesting. Hovudlageret av bøker og årsskrift har vore på Statsarkivet i Kristiansand, dvs. på Gimlekollen.
Årsmøtet 2007
Årsmøtet vart halde i "Majorstuen" på Evjemoen laurdag 14. april 2007. Det var møtt fram 41 direktemedlemer og lokallagsrepresentantar. Olaf Ingebretsen frå Vennesla kåserte om jernbana fram til 1938, medan Rita Flottorp framførte tradisjonsrike songar. Kontingentauke var ei av sakene på saklista, og årsmøtelyden gjekk samrøystes inn for å auke årskontingenten frå 220 til 250 kr.
Medlemsutvikling
Agder Historielag hadde 846 medlemer den 31.12.2007. 37 av desse var lokallag. Den store nedgangen i medlemstalet er dermed unngått.
Årsskriftet 2007
Årsskrift nr. 83 vart sendt ut i byrjinga av desember 2007 og var på 298 sider. Årsskriftet vart trykt i 1400 eksemplar, og er eitt av dei mest omfattande i lagets historie. Tema denne gongen var: Museumsvesenet på Agder, sosialhistorie (kriminelle barn, uekte barn og barnevandringar) og krigshistorie. I redaksjonskomitéen sat Beint Foss, Johnny Haugen, Marie T. Sørensen og Borghild Løver.
Egde
Medlemsbladet EGDE kom ut i to nummer i 2007. Redaksjonen for dette bladet var Borghild Løver og Beint Foss. Bladet vart trykt i 1000 eksemplar og sendt ut til alle medlemene.
Internettside
Internettsida til Agder Historielag har diverre ikkje vore oppdatert i 2007 på grunn av ressursmangel.
Årsskriftkatalog/-register
Registeret er på 32 sider og inneheld titlane på alle artiklane som er publisert frå 1914 og fram til i dag. Katalogen er digitalisert og vil vere mogleg å finne på heimesida etter kvart. Dette arbeidet er gjort av Hallvard Tveit i Valle. I tillegg har han digitalisert ALLE årsskrifta frå 1914 til og med 1948, slik at ein etter kvart skal kunne få høve til å sjå dei digitalt.
Sturla Ertzeid
Historielaget var på tampen av året i ferd med å ferdigstille eit dvd-prosjekt om og med Sturla Ertzeid, filma av fotograf Lars Emanuel Egeland frå Kvinesdal. På denne måten vonar historielaget å få festa den rike forteljartradisjonen og -måten til Sturla til film og slik ta vare på dette for komande slekter.
Løylandprosjektet
Boka om folkeminnesamlaren Jon Løyland er på trappane; den kjem antakeleg ut i 2008 og vert redigert av Leonhard B. Jansen.
Agders Historie
Det er kome ut fire band av Agdersoga:
• 1920-1945 (Kjell Olav Masdalen, 1991, 2000 eks.)
• 1840-1920 (Bjørn Slettan, 1998, 2000 eks.)
• 800-1350 (Torbjørn Låg, 1999, 2000 eks.).
• 1641-1723 (Ingeborg Fløystad, 2007, 2500 eks.)
Det femte bandet (1350-1640), som Stein Tveite skriv på, kjem truleg i 2009.
I komiteen for Agdersoga sit Ingeborg Fløystad, Stein Tveite, Bjørn Slettan, Gustav Sætra, Anne Tone Aanby, Berit Eide Johnsen og Rune Holbek.
Annan aktivitet/samarbeid
Agder Historielag skipa i samarbeid med andre til Agderseminaret på AAKS 12. og 13. okt., digitalt fotoseminar på Strand Hotell Fevik 27. oktober og "Arkivenes dag" på statsarkivet i Kr.sand 10. nov. I tillegg er historielaget sterkt medverkande til realiseringa av ei eiga brukargruppe av Bentsens hus og har hatt fleire møte saman med kommunen og dei interesserte i året som har gått.
Økonomi
Medlemskontingenten for 2007 var på 220,- kr., altså uendra. Vest-Agder Fylkeskommune gav eit driftstilskot på 75.000 kr., i tillegg til eit tilskot til Agdersoga på 50.000 kr. Frå Aust-Agder Fylkeskommune kom det 0 i driftstilskot og 50.000 kr. til Agdersoga. Rekneskapen viser eit underskot på kr. 37.729 kr i 2007, som fordeler seg på kr. 12.609 som gjeld Agdersoga og kr. 25.120 som gjeld vanleg drift. No skal det seiast at all porto og arbeidshonorar er lagt inn i drift - òg den som har gått med til utsending av Agdersoga.
På lager har me ståande ei mengd bøker som sjølvsagt utgjer ein stor verdi, men som ikkje er synt i jamvektrekneskapen. Desse vert talde ved flytting av kontoret. For fleire detaljar, sjå rekneskapsoversyn og revisjonsmelding.
Oppsummering
Historielaget har halde ein høg aktivitet òg i 2007. Sjølv om ikkje nettsida er vorten oppdatert, så er digitaliseringa som vart gjort av årsskrifta heilt frå 1914 og fram til 1948 eit utruleg viktig arbeid. Styret legg ned ein god og viktig innsats for laget, og har vore representert på 100-årsfesten til Søgne Historielag, oppstart av nytt historielag i Greipstad, historielagsmøte i Ny-Hellesund og på årsmøtet til landslaget. Beint Foss er dessutan varamedlem til styret i landslaget.
I tillegg har me hatt fleire viktige samarbeidspartnarar som me ynskjer å rette ein særskild takk og helsing til: Kristiansand kommune, Posebymarknaden, Christianssands Byselskab, Fortidsminneforeningen og Wergelandselskapet, i tillegg til Aust-Agder Kulturhistoriske Senter, Statsarkivet og fylkeskommunane.
Kristiansand, februar 2008